திருக்குறள் #20: நீர்இன்று அமையாது உலகெனின்...

நீர்இன்று அமையாது உலகெனின் யார்யார்க்கும்

வான்இன்று அமையாது ஒழுக்கு

-- திருக்குறள் #20 (வான் சிறப்பு)

பொதுவான பொருள்: நீர் இல்லாமல், நாம் வாழும் இவ்வையகம் இயங்காது. மழை பெய்யாவிட்டால், ஒருவரிடமும் ஒழுக்கமிருக்காது (மழையின்மை -> பஞ்சம் -> ஒழுக்கமின்மை -> மனிதமின்மை -> அனைத்தும் கோவிந்தா!).

இனி, வேறொரு பொருளை பார்ப்போம்.

🌷 மெய்யியலில், நீர் என்பது அசைவை (நிலையற்றதை) குறிக்கும். படைப்பில், அசையாதது, மாறாதது, என்றும் நிலைத்திருப்பது என்று ஏதேனுமிருக்கிறதா? இல்லை. தோற்றமும், மாற்றமும் & அழிவும் தொடர்ந்து நிகழ்ந்த வண்ணம்தான் இருக்கின்றன. எனவே, அசையும் பொருட்களில்லாமல் வையகமில்லை.

நீர்இன்று அமையாது உலகு = அசைவின்றி அமையாது வையகம்.

🌷 அடுத்தது, வான்இன்று அமையாது ஒழுக்கு.

மெய்யியலில், வான் என்பது மனதை குறிக்கும். வான் - விண் - விண்டு (விஷ்ணு) - மாயோன் - மாயை - மனம்.

ஒழுக்கு என்பது, இங்கு, பொருந்துகையை குறிக்கும். எதனோடு பொருந்தவேண்டும்? உள்ளபொருளோடு.

வெறுமனே பொருந்தி விடுவோமா? 😏 "தரும" அடி வாங்கினால்தானே "போதுமடா, சாமி" என்ற எண்ணமே வரும்! 😀 

அப்படி "தரும" அடி வாங்குவதற்கு என்னவேண்டும்? பற்றுகள் வேண்டும்.

பற்றுகள் எதன் வழியாக தோன்றும்? மனதின் வழியாக.

மனமின்றி பற்றுகள் கிடையாது. பற்றுகளின்றி தரும அடி கிடையாது. தரும அடியின்றி ஒழுக்கு கிடையாது.

வான்இன்று அமையாது ஒழுக்கு = மனமின்றி அமையாது உள்ளபொருளோடு பொருந்துகை.

இனி, இரண்டையும் சேர்ப்போம்:

அசைவின்றி அமையாது வையகம். இது போன்று, அசையும் மனமின்றி கிட்டாது வீடுபேறு.

oOo

🌷 கடவுள் வாழ்த்து = அசைவற்ற உள்ளபொருளை பற்றியது

🌷 வான் சிறப்பு = அசையும் மனதைப் பற்றியது

oOOo

கருணாகரமுனி இரமணாரியன் அடி போற்றி 🌺🙏🏽🙇🏽‍♂️

திரு அறிவுவெளி 🌺🙏🏽🙇🏽‍♂️

🪻🌼🪷🌼🪻