முழுக்க முழுக்க மெய்யியல் சார்ந்த ஒரு குறியீடான ஆந்தையை உயிருடனோ, அல்லது, உயிரற்ற அதன் உடலுறுப்பையோ வைத்து வழிபட்டால், பொருள் (தெய்வப்பிறவிக்கு மிகவும் பிடித்தமான காசு, பணம், துட்டு, டப்பு, மணி...) சேரும் என்பது முழு முட்டாள்தனமாகும்! 🤦🏽 குறியீட்டை தவறாக புரிந்துகொண்டு, அழியும் பொருளுக்காக, அதை வேட்டையாடுகிறார்கள்; கொல்கிறார்கள்; பல மடங்கு விலை கொடுத்து வாங்கி, வழிபாடு என்ற பெயரில் தீவினைகளை சேர்த்துக் கொள்கிறார்கள்!
(அன்பு கூர்ந்து, "மலர்மகள்-ஆந்தை" தொடர்புடைய தீபாவளி கதையை, இணையத்தில் தேடிப் படித்துக் கொள்ளவும்.)
🌷 மெய்யியலில், ஆந்தை என்பது விழிப்புணர்வை குறிக்கும்.
மெய்யறிவுத் தேடலில் இருக்கும்போது, விழிப்புடன் இருக்காவிட்டால் மெய்யறிவு கிட்டாது. மெய்யறிவு கிடைத்த பின்பு, விழிப்புடன் இருக்காவிட்டால் மெய்யறிவு பறிபோய்விடும். எனவே, மெய்யியலுக்கு விழிப்புணர்வு (ஆந்தை) இன்றியமையாததாகிறது.
🌷 ஆந்தையின் கண்கள் இருட்டில் நன்கு வேலை செய்யும்.
மெய்யியலில், இருள் என்பது தற்போது நாமிருக்கும் நிலையாகும். அதாவது, நம் மீது போர்த்தப்பட்டிருக்கும் உடலையும், கண் முன்னே தோன்றும் வையகத்தையும் உண்மையென்று கருதும் நமது அறியாமை.
"இருட்டில் காண்பது" என்பது, நம் உடலும், நம் மனதில் தோன்றும் எண்ணங்களும், கண்முன்னே விரியும் வையகமும் பொய்யென்றும், இப்பொய்யை உணரும் நாமே என்றுமுள்ள மெய்யென்றும் உணருவதாகும்.
🌷 வடவர்களை பொருத்தவரை, ஆந்தை மலர்மகளின் ஊர்திகளில் ஒன்றாகும். ஆந்தை என்பது விழிப்புணர்வு எனில், மலர்மகள் (செல்வம்) என்பது மெய்யறிவாகும்.
🌷 பாற்கடலை கடையும்போது தோன்றியவர் மலர்மகள்.
("பாற்கடல் கடைதல்" கதையை, அன்பு கூர்ந்து, இணையத்தில் தேடிப் படித்துக் கொள்ளவும்.)
🔸 பாற்கடல் - நமதுடல்.
🔸 மந்தார மலை - பகவான் திரு இரமண மாமுனிவர் போன்ற மெய்யறிவாளர்களிடமிருந்து வெளிப்பட்ட "தன்னாட்டம்" போன்ற நுட்பம் (டெக்னிக்).
🔸 வாசுகிப் பாம்பு - நமது மூச்சுக்காற்று.
🔸 பாம்பின் தலைப்பக்கம் இருக்கும் தேவர்கள் - நாம் உள்ளிழுக்கும் உயிர்வளி (ஆக்சிஜன்).
🔸 பாம்பின் வால் பக்கம் இருக்கும் அசுரர்கள் - நாம் வெளிவிடும் கரியமிலம் (கார்பன் டையாக்சைடு).
🔸 மலையை தாங்கும் ஆமை - புலனடக்கம்.
🔸 மேற்கண்டவற்றை கொண்டு செய்யப்படும் "கடைதல்" செயல் -
மூச்சை உள்ளேயிழுத்து வெளிவிடும் செயல், எவ்வாறு நம்மை அறியாமல் தானாக, இயல்பாக நடக்கிறதோ, அவ்வாறு, புலனடக்கத்துடன், தன்னாட்டம் போன்ற நுட்பத்தை தொடர்ந்து செயல்படுத்த வேண்டும்.
🔸 மூத்தவள் / மூத்தாயி / தவ்வை / மூத்த தேவி / மூதேவி -
மேற்கண்ட "கடைதல்" செயலை செய்யத் தொடங்கினால், அவரவர் ஊழ்வினையின் படி, முதலில், பல நுண்ணிய அறிவு, திறமைகள் வெளிப்படும். இவற்றால் பேரும், புகழும், பொருளும் கிட்டலாம். ஆனால், பிறவியறுக்க முடியாது. இதனால்தான், முதலில் வெளிப்படும் அனைத்தையும் சேர்த்து, "மூத்தவள் / மூதேவி" என்று பெயரிட்டுள்ளனர்.
🔸 இளையவள் / சின்னாயி / மலர்மகள் / இலக்குமி / ஶ்ரீதேவி -
வெளிவர வேண்டியதெல்லாம் வெளியே வந்த பிறகு, இறுதியில், "தி ட்ரூமேன் ஷோ" (The Truman Show) திரைப்படத்தின் இறுதியில், ட்ரூமேன் உணருவது போல, எல்லாம் வெறும் ஒலிஒளி காட்சியென்பதையும், அக்காட்சியை இதுகாறும் கண்ட நாமே உள்ளபொருள் என்பதையும் உணருவோம். இதுவே மெய்யறிவு - இளையவள் - இலக்குமி - செல்வம் - ஞானம் - அமிர்தம் எனப்படும்.
oOo
இதுவரை நாம் கண்ட "ஆந்தை" குறியீடு மட்டுமல்ல, தீபாவளியுடன் தொடர்பு கொண்டுள்ள
- நரகாசுரனை கண்ணன் கொன்றது
- இராமன், சீதை & இலக்குமணன் அயோத்திக்கு திரும்பியது
- காட்டு வாழ்க்கையை முடித்துக் கொண்டு பாண்டவர்கள் நாடு திரும்பியது
- பாற்கடலிலிருந்து மலர்மகள் தோன்றியது
ஆகிய அனைத்து குறியீடுகளும், மெய்யறிவு பெறுதல் என்ற ஒரே நிகழ்வை உணர்த்துகின்றன.
மெய்யறிவே செல்வம்! அதை அடையும் பொழுதே தீபாவளி!
oOOo
எப்பொருள் யார்யார்வாய்க் கேட்பினும் அப்பொருள்
மெய்ப்பொருள் காண்ப தறிவு 🌺🙏🏽🙇🏽♂️
கருணாகரமுனி இரமணாரியன் அடி போற்றி 🌺🙏🏽🙇🏽♂️
திரு அறிவுவெளி 🌺🙏🏽🙇🏽♂️
🪻🌼🪷🌼🪻
